BICOL – DIREKTA nang mareresibe kan publiko particular kan mga byahero asin motorista an mga road safety tips, updates asin iba pang importanteng anunsyo kan Land Transportation Office – Bicol.
Activated na kaya an ALERTO LTO na sarong message notification service para sa mga Bicolano.
Gamit an ALERTO LTO mareresibe an mga pagiromdom dapit sa lisensya, rehistro, mga road safety tips, anunsyong pampubliko, asin iba pang impormasyon na kabale digdi sa paagi kan SMS alerts.
Segun sa LTO-Bicol, obheto kan proyektong ito na pakusugon an pagpapalakop nin impormasyon dapit sa mga mandato asin transaksyon kan LTO tanganing maibitaran man an fake news, misinformation, asin paggamit nin mga fixers.
Simbag man ini kan ahensya sa naglalakop na panloloko online sangkot an mga indibidwal na nag oofresir kan serbisyo karibay an kwarta dawa an mga ini an bako man direktang konektado sa sainda.
Mantang kun mawot soboot na makaresibe nin text message gikan sa ALERTO LTO, i-scan sana an QR Code o pilion an link na naka post mismo sa saindang official facebook page na LTO-Bicol.
Kompyansa an ahensya na positibo an magiging simbag digdi kan mga Bicolano asin padagos na susuportaran an saindang ipigbubusol na adbokasiya urog na an KSK o Kaligtasan Sa Kalsada Ng Bikolandia.
