Matapos ro masobra 30 dag-on sa law enforcement service, nagretiro eun si Aklan police director Colonel Ramir Perlito Paradero Perlas.
Si Perlas hay gintaeana nga mamuno sa Aklan Police Provincial Office ku Enero 20, 2021. Ginpamunuan nana raya it kapin sa 11 ka buean.
Base sa pahayag ni Perlas, sa anang sebisyo sa pulisya, nasayuran nana ro importansiya it pagiging positibo ag pagiging masigasig. Gindayaw man nana ro mga kapulisan agud mas mapanami ro imahe ag kredibilidad it mga kapulisan sa Aklan.
Ginkilaea man ni Perlas ro tanan nga personnel it Aklan police office sa andang dedikasyon sa serbisyo.
Bago maging sambilog ka pulis, naging manugturo sa Boracay National High School Malay, Aklan si Perlas.
Nag-eskwela uman imaw sa Philippine National Police Academy kaeakip sa Class 1993 ku 2002, nagserbe imaw bilang sambilog ka peacekeeper it United Nations sa Timor-Lieste (East Timor).
Nagtrabaho man imaw sa Regional Mobile Group sa Negros Occidental ag sa mga istasyon it pulisya sa Batan, Aklan ag Molo, Iloilo City.
Si Perlas hay naging police provincial director it Dinagat Islands ag Agusan del Sur ag hepe it Regional Investigation and Detective Management Division it Police Regional Office – Caraga Administrative Region bago raya nga magserbe sa probinsiya it Aklan./JIL B. LACSON
