SORSOGON CITY – Arestado ang 60-anyos na magsasaka makaraang hainan ito ng kanyang warrant of arrest sa kasong attempted murder sa Brgy Poblacion, Monreal, Masbate.
Kinilala ang akusado na si Ely Manlapaz Andaya, may asawa, magsasaka at residente ng Brgy Cantorna ng nasabing bayan.
Si Andaya umano ay miyembro ng Militia ng Bayan (MB) sa ilalim ng pamumuno ni Eleazar Ontog alias Ka Randy, lider ng Squad 2, Platoon 2, Larangan 1, Komite Probinsyal 4.
Ang pag-aresto ay sa pamamagitan ng bisa ng warrant of arrest na ipinalabas ng RTC 5th Judicial Region, Br 50, San Jacinto, Masbate na may itinakdang piyansa na P120, 000.00.
Sa pahayag sa Brigada News ng Monreal MPS, marami pang kasong kinakaharap si Andaya at muli nila itong sisilbihan ng warrant of arrest kapag napasakamay na nila ang mga ito mula sa korte.
