GIBANTAYAN sa National Bureau of Investigation – Sarangani District Office (NBI-SARDO) ang massage parlors nga gikaengong lambigit sa human trafficking, karon nga ang GenSan naa na sa relaks nga quarantine restrictions.
Matud ni Atty. Regner Peneza, labaw sa NBI-SARDO pinaagi sa gipadalang text message, hugot nilang gi-monitor ang maong klase sa establisimento. Tungod sa pipila ka hitabo sa Cebu City nga nagsakuban lang nga massage parlor ang operasyon apan kini ang gihimong prostitution den. Asa ang biktima nga attendants ang nagatanyag og sekskwal nga aktibidad bugti sa salapi.
Rason kini sa panawagan sa opisyal sa publiko nga makig-alayon kanila ugaling dunay nasayran nga susamang aktibidad. Gihingusgan ni Peneza nga ang human trafficking ang usa sa primary jurisdictions nila asa makapahigayon sila og imbestigasyon ug operasyon isip usa sa ilang mandato. I Richel Gubalani
