KORONADAL CITY — UMAABOT sa 248 na mga beauticians, barbero, at masahista sa Tacurong City ang nabigyan ng emergency employment ng local government.
Nasa ilalim ng personal care service sector ang nasabing mga trabahante na nawalan ng trabaho matapos nag-sara ang kanilang mga shops o pwesto dahil sa implementasyon ng General Community Quarantine sa lalawigan ng Sultan Kudarat noong Hunyo.
Nasa P1.24 million ang inilaan ng city government ng Tacurong bilang tulong sa mga apektadong trabahante kung saan makakatanggap ng tig-P5,000 na sahod ang bawat isa sa mga ito kapalit ng 15 araw na trabaho.
Kabilang sa trabaho ng mga ito ang ang pag-disinfect at paglinis ng kanilang mga pwesto at kabahayan na nagsimula noong Setyembre 1 at magtatapos sa Setyembre 21.
