Nailabas na ng Philippine Health Insurance Corp. (PhilHealth) ang halos P12 billion na halaga ng COVID-19-related benefits claims ng mga ospital.
Ayon kay PhilHealth vice president for corporate affairs Shirley Domingo, ang COVID-19 claims ay kinabibilangan ng testing packages, community isolation unit benefits, at in-patient benefits.
Giit ni Domingo, ang naturang halaga ay katumbas sa 50% ng total COVID-19 claims na natanggap ng state health insurer, habang ang iba ay pino-proseso na.
Dagdag ng PhilHealth official, ang malaking bahagi ng hindi nabayarang COVID-19 claims ay may kaugnayan sa testing at ang ilang ospital ay hindi nakasumite ng mga kinakailangang dokumento, na nagresulta sa pagkaantala sa pagpapalabas ng payments.
Una nang sinabi ng Malacañang na hiniling ni Pangulong Rodrigo Duterte sa PhilHealth na bayaran na ang bilyon-bilyong pisong halaga ng unpaid hospital claims sa lalong madaling panahon sa gitna ng COVID-19 pandemic. // MHEL PACIA-TRINIDAD
