Nagdangat sa P94,972.11 ang nataban sang isa ka empleyado sang kompanya matapos wala sini ma-remit ang balor sang kwarta sa ila opisina sa Brgy. Tanza Gua, Roxas City sang tinalikdan nga Hulyo 15.
Sandig sa ginpabalhag ni alyas “Jocelyn”, 40-anyos, sales manager sang Distribution Company sa Roxas City Police Station, sadtong Hulyo 15, gin-review sang ila account specialist nga si alyas “Tin-tin” ang ila sales kag didto natukiban nga madamo sang overdue nga A/R. Nadesisyonan sini nga bisitahan ang ila kliyente sa may bahin sang Ajuy, Iloilo agud magpatigayon sang audit apang nadiskubrehan man nga nakabayad na pero wala na-remit ni alyas “Mechele”, Mass Major Specialist sa ila opisina.
Ginapahayag nga ginpapanaugan nila sang memo si alyas “Mechele” agud magpaathag, apang pagkalipas sang duha ka adlaw nagpasa ini sang resignation.
Gin-take over ni alyas “Jocelyn” ang ginhalinan nga trabaho ni alyas “Mechele” kag didto pagid nahibaluan nga madamo sang mga kliyente ang nakabayad na apang wala na-remit ang kwarta sa ila opisina.
Bangud sini, ginpakamaayo nalang sang sales manager nga ipabalhag sa kapulisan ang natabo. | Judy Ann Juare
