LEGAZPI CITY – May pigklaro an Daraga North Central School manungod sa pinaotob nindang polisiya na dai na pigtutugutan an mga magurang na maglaog sa bisinidad kan nasambit na eskwelahan.
Segun kay Floresita Sadueste, principal kan nasambit na eskwelahan, pwedesir man giraray maglaog an mga magurang orog na kun may concerns.
Sinabi niya, pigpautob ninda an siring na polisiya nin huli sa insidente nin panununtok ki sarong outsider sa nagkapirang estudyante.
Dugang pa kaini, nagrereklamo an ibang paratukdo manungod sa dae pagtapok nin basura sa tamang lugar asin nagkakapasuwayan an ibang magurang sa waiting area.
Mientras, pinahimutikan man niya an mga alegasyon na igwang estyudanteng nawawara asin pigklaro ni Sadueste na pighahatod kan mga paratukdo an estyudante sa gate pag oras na ki dismissal kan klase. | Brigada Intern MAUREEN BONANZA
