GI-DENY sa Philippine Health Insurance Corporation (PhilHealth-12) ang 46% o P47 milyon nga claim sa pampublikong ospital sa GenSan. Dungan sa pagpabilin sa Dr. Jorge P. Royeca Hospital (DJRPH) isip level 1 hospital.
Matud ni Hannah Naanep, PhilHealth-12 public information officer, kini base sa memorandum circular nga gipagula sa Philhealth. Ang level 1 hospital sama sa DJRPH ang dili mahimong moatiman og severe ug critical Covid-19 patient.
“Yung denied po kasi nila, in the first place yung hospital na yan ay level 1, so in terms of Covid claims ang pede lang po nilang i-file sa office natin ay yung mga claims na mild and moderate, base po yan sa circular 2020-009 and advisory 2021-037,” asoy ni Naanep.
Dunay polisiya ang ahensiya nga kung level 1 ospital dili mahimong maka-file og severe ug critical claims tungod walay surge.
Gawas sa na-deny dunay 17% claim ang DJPRH nga na-return to hospital tungod sa kakulangon sa dokumento. Samtang na-claim na sa maong tambalanan ang 36% claim alang sa mild ug moderate Covid-19 patient.
Una nang, gihingusgan ni Dr. Ryan Aplicador, labaw sa DJPRH nga dunay sila’y kapasidad sa pag-atuman sa severe ug criticial Covid-19 cases. Nakalabay’ng tuig, giduso sa maong ospital ang level 2 accreditation pinaagi sa paghikutar sa mga kinahanglang rekisitos.
Kahibaloan nga mokabat sa P137 milyon ang kinatibuk-ang claim sa DJPRH sa Philhealth lakip ang non-covid cases. Ang desisyon sa Philhealth ang una nang giapela sa DJPRH pinaagi sa pagsumite og motion for reconsideration (MR). I Richel Gubalani
