ANDAM na ang Local Government Unit sa General Santos alang sa national evaluators sa Department of Interior and Local Government (DILG) nga magsusi sa mga indicators alang sa Seal of Good Governance (SGLG) sa 2021.
Sa kumpirmasyon ni Department Head II Glenville Gonzales nga karon na assign sa Strategic Performance Management and Compliance Office (SPMCO) nga Septembre 6 ang schedule para sa evaluation sa LGU Gensan.
Himuon sumala pa ang evaluation sa mga indicators sa performance sa syudad sa Mayors Conference Room ug may mga labaw sa departamento, division nga gi-imbitahan aron nga motubag sa posibleng mga pangutana gikan sa DILG.
Gidugang ni Gonzales nga malaumon sila nga makuha na sa LGU General Santos City ang SGLG nga wala pa nakuha sa Gensan. Nagapasalamat usab si Gonzales sa suporta sa Mayor.
Gikumpirma usab ni City Permits and Licensing Division Office Head IV Geraldine Zamora nga apil siya sa naimbitahan nga mo-atubang sa mga evaluators, ginalauman na niini ang mga pangutana kalabot sa kadaghanan sa naglukat og business permit, pila ang investments, pila ang revenue generation sa business tax ug unsa kapaspas ang pagproseso sa permit. I Ver Diazon
