MALINAWON ang kinatibuk-ang selebrasyon sa ika-24 Tuna Festival sa GenSan, butyag sa GenSan City Police Office (GSCPO), Lunes.
Matud ni PCol. Paul Bometivo, acting city police director sa GSCPO wala’y natala nga krimen atol sa lima kaadlaw nga selebrasyon.
Nakatabang sa malinawon nga selebrasyon mao ang pagtinabangay sa kapulisan, kasundalohan, security force multiplier, LGU ug komunidad.
Atol sa Setyembre 1-5 Tuna festival, mokabat sa 500 pulis ug kasundalohan ang gipakatag sa tibuok dakbayan. Partikular na sa mga kadalanan atol sa float parade, Sugbahan sa dalan ug mga pasundayag sa oval grandstand.
Una nang, gibawal sa kapulisan sa pagsulod sa oval plaza ang pagsuot og jacket, pagdala og hait nga butang, pag-inum og ilimnong makahubog ug pagdala og pusil sulod sa activity areas.
Kahibaloan nga human sa duha katuig nahimo nang face-to-face ang selebrasyon sa Tuna Festival karong tuiga. I Richel Gubalani
