Gipahibawo sa Police Regional office-7 nga misaka na sa pito ka mga pulis ang namatay tungod sa komplikasyon nga dala sa covid-19.
Kini human adunay tulo ka nadugang sa mga namatay sa nanglabay nga duha ka buwan.
Gibutyag ni Police Brigadier General Ronnie Montejo, director sa PRO-7 nga gawas sa mga namatay, aduna usab 187 ka mga pulis nga kasamtangang infected pa sa maong virus.
Sa nahisgutang ihap, anaa sa 178 niini ang anaa sa isolation facility samtang siyam ang nalandig sa tambalanan.
Kahinumduman nga niining buwana, namatay sa covid-19 ang deputy station commander sa lungsod sa Asturias Police Station ug aduna usab polis sa Toledo City Police Station ang namatay tungod gihapon sa Covid-19.
Subay niini, nanawagan si Montejo sa kapulisan nga magpabakuna na aron makabaton ug proteksyon batok sa severe case sa Covid-19.
