PULOS tanan gipanghimakak sa labaw sa Human Resource Department sa LGU-GenSan Leah Tolimao ang mga alegasyon ni Kagawad Dominador Lagare Jr. batok kaniya kalabotan sa pag-hire og mga empleyado sa lokal nga panggamhanan.
Gitino ni Tolimao nga makuti ang proseso sa pag-hire og empleyado, ug tanan ang nasubay sa Civil Service Commission ug dili siya ang makabuot ug makapagusto kinsa ang iyang ibutang sa pwesto.
Gawas sa general qualifications nga gitakda sa balaod, adunay competency gawas sa 60 percent nga evidence based aduna pay background investigation ug ang pinakaulahi mao na ang pag-aproba sa mayor.
Ang pagpili sa aplikante moagi usab sa Personnel Selection Board ug gitino ni Tolimao nga usa lang siya sa pito ka miyembro sa board mao nga dili mahimong impluwensyahan ang pagpili og aplikante sa usa ka posisyon sa gobyerno.
Gitino usab ni Tolimao nga sa HR department ni usa wala kini kabanay apan gitawag matud pa nga pamilya ang mga kaubanan sa maong buhatan.
Sa karon bugtong tambag ni Tolimao sa mga gustong masayod sa mga proseso sa hiring nga makigsayod kanila tungod anaa usab ang mga records nga ilang makuha.
