GIKATAKDANG magpahigayon og konsultasyon ang taga Public Safety Office, Market Administration,Treasuers Office ug ang taga Barangay South kalabot sa plano nga pagpatuman na sa parking fee nga tag 10 pesos matag oras sa parking area sa palibot sa Central Public Market.
Sa kumpermasyon sa bag-o lang na-promote nga Market supervisor III nga si Carlito Esclamado sumala niini nga sa ilang opisina ang venue sa konsultasyon nga tambungan sa mga opisyal gikan sa upat ka mga opisina.
Gidugang ni Esclamado nga unta mapaspasan na ang mao nga plano kay guot kayo ang palengke gumikan sa kadaghang sakyanan nga naga parking ug inadlaw sa palengke unya walay buhis nga makuha ang taga gobyerno, basi daw sa ordinansa nga napasa sa konseho tag P10 pesos ang bayad sa parking matag oras.
Kon mapatuman daw ang mao nga ordinansa madugang kini sa kita sa syudad nga ginasingil sa taga Treasurers Office samtang ang ilang trabaho mao ang admin matters.
Ang laing lakang aron muloag ang parking areas mao ang pagbalhin sa mga nagaturno nga sakyanan ngadto sa bakanting area sa Barangay South ug ang mo-adto sa pickup points ang mga nakaturno lang nga molarga na sa ilang destinasyon. I Ver Diazon
