WALA pa mahatag gikan sa Office of the Senior Citizen Affair (OSCA) Gensan, ang 500 pesos nga local pension sa mga Senior citizen lakip ang ilang birthday cash gift nga 2,000 pesos.
Matud ni Celso Mendoza kasamtangan labaw sa OSCA, wala pa ma-proseso ang Implementing Rules and Regulations kun IRR tungod daghan pa og gihikutar ang City Social Welfare and Development Office nga maoy incharge sa paghimo niini.
Kalabot sa maong hisgutanan usa ka nagpangalang Anita Pontilar nga taga Barangay Baluan ang nagpa-abot sa iyang komento, segun niini nagsaad ang labaw sa mga Senior Citizen nga makadawat og 2,000 pesos nga birthday gift ang mga katigulangan sa pagsaulog nila sa ilang adlawng natawhan, apan sa iyang pagkahibalo wala pay nakadawat gikan sa ilang Barangay.
Nanghinaot si Anita nga maaprobahan na ang maong benepisyo aron makatabang kanila sa pagpalit og pagkaon, tambal, ug uban pa. Dugang niini gihulat pa ang sunod nga molingkod isip labaw sa OSCA bag-o matud pa masugdan ang proseso aron subli nang mahatag ang benepisyo sa mga Senior citizen. I Enamie Mogpon
