Gikumpermar sa mga otoridad nga usa ka tripulante ang namatay, samtang tulo ang naangol, dihang nasunog ang usa ka container ship samtang naglawig sa kadagatan sa dakbayan sa Talisay, kagahapon.
Nakuha sa Bantay Dagat ang lawas ni Chief Engineer Nelson Polvorosa, 62 anyos, kawani sa MV General Romulo diin puno sa sunog ang lawas niini dihang na-ugkat.
Samtang ang laing tulo ka tripulante sa barko nga naangol daling gidala ngadto sa Cebu South Hospital diin kasamtangang gi-confine alang sa padayung pagtambal.
Ang barko adunay kinatibuk-ang 20 ka mga tripulante, diin 16 niini ang malampuson nga naluwas.
Basi sa pasiunang taho gikan sa Philippine Coast Guard Central Visayas (PCG-7) nagpakita nga ang mga tripulante sa barko nagpadala og distress signal mga alas 9:50 sa buntag samtang naglawig paingon sa pantalan sa dakbayan sa Sugbo.
Niadtong tungora, ang barko nga gipanag-iya ug gi-operate sa Lorenzo Shipping Corp., didto sa baybayon sa Barangay Pooc, dakbayan sa Talisay.
Ang barko nagdala og 2,218 ka tonelada sa nagkalain-laing kargamento gikan sa Metro Manila.
Di mominos lima ka mga barko ang niresponde sa insidente.
Sa pagkakaron, padayun pa ang gihimong gi-imbestigasyon sa otoridad aron masayran ang hinungdan sa sunog.
