Magiging optional na ang work from home arrangement sa mga lugar na mapapasailalim ng Alert Level 1 sa susunod na buwan sa gitna ng bumubuting sitwasyon ng COVID-19 sa bansa.
Sinabi ni Trade Secretary Ramon Lopez na mas pinapaboran ang onsite work sa Alert Level 1.
Naniniwala ang kalihim na lalo nitong palalakasin ang mga negosyo tulad ng mga tindahan at restaurants dahil mas darami ang mga tao na lalabas ng kanilang bahay.
Inanunsyo ng gobyerno noong weekend na malalagay ang National Capital Region (NCR) at ilang lugar sa bansa sa ilalim ng Alert Level 1 mula March 1-15, 2022.
Sa ilalim ng Alert Level 1 ay papayagan ang lahat ng establishimyento, mga tao, o mga aktibidad na mag-operate sa 100% capacity.
Gayunman, nilinaw ni Lopez na mananatili ang vaccination requirement para sa indoor activities.
