MALINAWON sa kinatibuk-ang ang weeklong nga filing sa Certificates of candidacy (COC) alang sa barangay ug sangguniang kabataan elections (BSKE) sa GenSan ug Sarangani.
Matud ni Police Col. Nicomedes Olaivar, OIC city police director sa GenSan City Police Office (GSCPO) luyo sa pagdagsa sa mga aspirant sa unang adlaw sa filing sa COC sa Commission on Election(Comelec). Wala na’y natala nga dili maayong insidente kalabut sa filing sa COCs ang kapulisan. Hapsay usab ang nahimong sitwasyon sa pagfiling sa COCs sa probinsiya sa Sarangani, luyo sa pagbutang sa walo ka barangay sa Maitum sa areas of concern.
Sa impormasyon sa mga opisyal sa Sarangani Provincial Police Office (SPPO) malinawon usab ang filing sa COCs sa maong munisipalidad. Samtang, naglaom ang mga opisyal sa kapulisan nga magpadayon nga malinawon ang pagsugod sa kampanya ug sa election period.
Luyo niini, pabiling nga nakataas ang alerto sa kapulisan sa sargen kalabut sa taliabot nga barangay ug sangguniang kabataan election (BSKE). Sa Sarangani, mokabat sa 5,073 ka mga aspirant ang nag-file na sa COCs gikan Agosto 28 hangtud na 30.
Sa datus sa Comelec-12, naa sa 469 ang alang sa pagka-kapitan; 2,644 pagka-kagawad; 477 SK chairperson samtang 1,456 ang SK councilors. Ang probinsiya sa sarangani ang dunay 142 kinatibuk-ang barangay. I Richel Gubalani
