Ginpasiguro ni Noe Pador, Market Supervisor II it Kalibo Public Market nga ro LGU hay haum nga itao ro tanan nga kinhangeanon it mga vendors nga iga-relocate sa Eastern Side Terminal sa San Lorenzo Drive sa Barangay Andagao, Kalibo.
Kumpleto segun ro relocation kaparehu it CR ag tubi, may sectioning man agud ro mga naga panindahan hay indi magtaeang kung siin masueod ag maguwa. Maga padayun man segun ro market day.
Haeos tanan segun nga vendors hay may lugar sa relocation site pero indi segun kay Pador pagsugtan ro mga gabaligya sa mga kilid bangud unfair raya sa mga may lisensya.
Uman nga ginklaro ni Pador nga temporaryo manlang ro relocation bangud igapaubra pa ro modernize Kalibo Public Market agud maging komportable man ro mga negosyante ag mga market goers kung mahuman eon raya.// ANN DESLENE SALAZAR
