NAGPAABOT og impormasyon ang wala nagpailang vaccinator nga na- assign sa Tapat nga tulo ka bulan na sila nga wala nakadawat og sweldo gikan sa city government sa GenSan.
Sa impormasyon gikan sa usa ka vaccinator langay kaayo ang ilang sweldo mao nga apektado usab ang ilang pagtrabaho ilawom sa Tapat program sa syudad sa pagrespondi batok sa pandemya.
Tungod niini nagapatabang ang concerned worker sa Brigada aron masayran ang mga hinungdan sa pagkalangay sa ilang sweldo.
Sa bahin ni Chief Admin Officer Karl Quipo sa Mayor’s Office ang incharge sa Tapat program sumala niini nga ang proseso sa LGU sa pasweldo adunay ginasunod nga nasudnong balaud ug kon may kulang nga dokumento dili magmalampuson ang proseso sa sweldo kay dili dawaton sa Accounting office kon may kulang sa dokumento.
Gidugang ni Quipo nga ang usa ka problema alang sa mga bag-ong nasulod sa contract service mao nga wala dayon nakompleto ang papelis gikan sa mga ahensya sa gobyerno.
Samtang sa mga nadugay na sa trabaho ang problema nga nagagawas mao ang dili sibo nga record sa Daily Time Record kon DTR kon may usa nga dili sakto madamay ang usa ka grupo nga kadungan sa sweldo.
Gidugang pa ni Quipo nga sa miaging mga semana na quarantine sila ug ang iyang sakop lakip ang nagaproseso sa papelis kay nagpositibo sa COVID-19 mao nga may kalangay sa papelis ug sa sweldo. ( Ever Diazon)
Photo file: LGU-Gensan
