GIDALA sa estasyon sa presinto singko ang upat ka mga batan-ong lalaki human nga gidakop sa ilang mga silingan sa Purok San Miguel, Brgy. Calumpang, GenSan human nga gitudlong nangawat og isdang tilapia sa usa ka vendor samtang walay tawo ang panimalay.
Ang upat ka mga batan-ong lalaki pulos minor de edad ug nagpuyo sa Purok San Miguel,Calumpang, naka lipstick pa sa dihang naabot sa presinto.
Sumala sa Vendor nga si Norwina Guinang, 48-anyos may mga anak nga ginapa eskwela, niadto siya sa lamay gabii sa adlaw nga Martes kuyog ang ubang silingan apan sa ilang pagpauli nasugatan nila ang mga batan-on nga dunay dalang mga tilapia gikan daw sa habwa.
Gidugang ni Guinang nga nakuratan nalang siya nga wala na sa iyang gibutangan nga refrigerator ang 12 kilos nga tilapia, tungod niini nagpatabang siya sa ilang opisyal sa purok.
Sa bahin ni Maria Fely Balayo ang Purok Chairperson tulo kabuok tilapia ug usa ka parilyahan ang ilang nabawi, gihatag daw kini sa mga batan-on sa usa sa ilang kabanay sa lugar.
Gikuhaan usab ug impormasyon sa Womens and Childrens Protection Desk ang upat ka batan-on aron mapahibalo ang ilang ginikanan,samtang nagsulti ang vendor nga dili mopasaka og kaso kon mauli ang iyang tilapia o kaha ang iyang capital niini. I Ver Diazon
