BANGA, AKLAN — Sangka 15yo nga binatilyo ro natumod ag ginkumpirma nga may kahimuan sa natabo nga panakawan sa sangka panimaeay sa Poblacion Banga, Aklan ku nagtaliwan nga Disyembre 2021.
Sa interview it Brigada News FM Kalibo kay Police Staff Sergeant Danilo Dalida, ro suspek hay sangka 15yo nga binatilyo nga unga it sambilog sa mga kasambahay sa nasambit nga baeay.
Nasayuran nga nagaabot sa tunga sa milyong piso ro kabilugan nga balor it tinakaw it suspek sa baeay nga ginaeakipan it mga alahas.
Ro tag-ana it baeay nga pamilya Indelible hay sa Manila ag nadiskubre eang nanda nga tinakawan sanda kat umuli ro mga raya sa Banga ku adlaw it Paskwa.
Nadakpan ro suspek matapos makipagbueoligan sa mga pulis ro anang nanay matapos mahalata nga may kakaiba sa suspek bangud pirme rayang may kwarta.
Narekober sa 15yo ro haeos 70 porsyento it tinakaw kara samtang ro iba sa mga alahas hay nabaligya eon kara sa sangka tawo nga nagabakae it mga samad nga alahas ag kung indi raya makipagkooperar sa kapulisan hay pagakasuhan man imaw it pag eabag sa Anti-Fencing Law.
Samtang, gin-abisuhan eon it Banga PNP ro pila sa mga pawnshop nga nabaligyaan it tinakaw nga alahas.
Sa makarun hay sa kustodiya eon ro 15yo it DSWD Banga samtang ginahueat ro desisyon it pamilya Indelible kung pagakasuhan ro menor-de-edad nga suspek. / ANN DESLENE SALAZAR
