Gikatakdang ipasaka karong adlawa ang kasong Murder batok sa usa ka laborer, 28 anyos nga taga Brgy Lapu-Lapu ning syudad kinsa suspek sa pagdunggab-patay sa iyang kainom pasado alas 2:00 sa kadlawon sa milabay’ng adlaw.
Ang biktima giila sa kapulisan nga si Volter Racasa, hamtong ang pangidaron nga residente sa Samal, Davao del Norte. Sa eksklusibong pakighinabi sa Brigada kang Pcapt Rizalito Clapiz III, Deputy Station Commander sa Sta. Ana Police Station, sigon niini nga kaubang nag-inom matod pa sa tindahan ang suspek ug biktima ug dihang lango na kini sa ilimnong makahubog, nagkalalis matod pa ang duruha dihang gipasanginlan sa biktima ang suspek nga intel o asset.
Nasulayan usab og hinabi sa Brigada ang suspek ug sigon niini nga ginabalik-balik sa biktima ang pasangil nga intel matod siya ug sa iyang kasuko hinungdan nga nabuhat niya ang krimen.
Nagpaabot usab og pagpangayo og pasaylo ang suspek sa pamilya sa biktima uban sa pagmahay sa iyang nabuhat. Paslak na karon sa prisohan sa Sta. Ana Police Station ang maong dinakpan.
