Inanunsiyo ng Department of Transportation (DOTr) na papayagan na lamang makasakay sa mga pampublikong transportasyon ang mga hindi bakunado at partially vaccinated sa loob ng 30-araw simula Enero 26 habang nasa ilalim ng Alert level 3 ang Metro Manila.
Ayon kay Tranportation Usec. Atty. Artemio Tuazon Jr. ito umano ang napagkasunduan ng DOLE, DILG at DOTr.
Pagkatapos ng isang buwang palugit hindi na papayagan ang mga unvaccinated workers na gumamit o sumakay ng public transportation sa alinmang parte ng National Capital Region.
Nilinaw naman ng opisyal na maaring gumamit ang mga unvaccinated ng active transport, sariling sasakyan, o kaya ay company shuttle service papasok sa kanilang trabaho.
Paliwanag ni Tuazon ito ay upang matiyak na tanging mga protektado lamang kontra COVID-19 ang sumasakay sa public transport matapos lumabas sa pag-aaral na malaki ang tiyansa na maospital ang mga unvaccinated na indibidwal kapag mahawaan ng virus.
