Arestado sa gikasang operasyon ang unom ka mga myembro sa drug group sa hiniusang pwersa sa otoridad nga gilangkuban sa PDEA-XI, DNPPO sa Purok 7 Lower Apokon Tagum City kagahapon sa kadlawon.
Bitbit sa operatiba ang managlahing mga search warrant nga gipagawas sa korte gihalughog ang mga balay sa suspek sa maong lugar sa tabang sa K9 dogs ug usa na dinhi ang target nga si Randy Lumanta.
Narekober sa panimalay ni Randy Lumanta ang mga pakete sa droga, kagamitan sa pagyupyop sa iligal nga droga nga ginagamit sa higayon nga dunay sesyon lakip ang mga gipangtaya na nga ubay-ubay ka kalibre sa pistola.
Gawas kang Lumanta nasikop usab ang lain pang mga drug suspek nga sila si Arnold Lagunsay; Rodel Morito; Reden Tipas ug laing walo pa ka persona samtang duha ang nakasibat sa operasyon.
Sa kinatibuk-an oabot sa 52 gramos ang narekober nga droga nga gibana-banaang mokantidad og P750,000.00.
Ang grupo ni Lumanta taud-taod nang gihap-an sa otoridad human nakadawat og impormasyon ang PDEA-XI labot sa operasyon sa grupo.
Ang mga nadakpan gipagpaslak na karon samtang pareho nag mag-atubang og kasong pagsupak sa RA 9165 ug laing kaso kalabotan sa RA10591 ang atubangon ni Lumanta.
Ayha ang operasyon, naglusad una og plano ang PDEA-XI Huwebes pa lang sa gabie ug gigamitan og drone sa otoridad ang lokasyon sa mga target hinungdan nga walay casualty sa operasyon.BNFM-DAVAO
