Padayon nga nagpa-alim ang usa ka lalake human nga gipusil kini saiyang ama-ama sa Purok 1, Barangay Asuncion, Carmen, Davao del Norte.
Ang biktima giila nga si La-Ar Jib Dio Enriquez, alias “Arjib”, 29 anyos, ulitawo, walay trabaho, ug residente sa Jacinto Extension, Roxas Boulevard, Davao City samtang ang suspek giila nga si Edgardo Lina Japay, 54 anyos, walay trabaho, minyo, ug residente sa Purok 1, Barangay Asuncion, Carmen, Davao del Norte.
Subay sa imbestigasyon, miabot ang biktima sa panimalay sa suspek og gituohang lango sa ilimnong makahubog samtang nagdala-dala og kutsilyo.
Naglalis matud pa ang duruha ug tungod sa kapungot, mihulbot og armas ang suspek og gipusil ang biktima sa likod nga bahin sa iyang ulo.
Daling girespondehan ug gidala sa balay tambalanan ang biktima samtang ang suspek mitahan saiyang kaugalingon sa mga kapulisan.
Narekober sa crime scene ang usa ka kitchen knife nga 9 inches ang katas-on, 1 ka revolver caliber pistol nga adunay usa ka live ammunition ug 4 ka blank cartridge.
Gikustodiya na ang suspek ug gikatakdang kasohan tungod sa krimin nga gihimo. BNFM-DAVAO
