Wala kalusot ang usa ka lalake human nga gisulayan niini og pasulod sa kontrabando sa Davao City ug naharang sa mga personahe sa Task Force Davao ug Davao City Police Office sa Lasang Checkpoint, kagahapong adlawa.
Ang suspek giila nga si Fernando Advincula Pusta, 44 anyos, minyo, ug residente sa Purok 1-A Cadunan, Mabini, Davao de Oro.
Subay sa report sa kapulisan, naharang ang suspek atol sa gipahigayon na inspeksyon sa checkpoint samtang nagmaneho kini saiyang pick-up nga sakyanan pasulod dinhi sa dakbayan sa Davao.
Nakumpiska sa suspek ang pakete sa gituohang shabu nga mitimbang og 0.65 grams nga nagkantidad og 10,400.00 lakip na ang gimanehong sakyanan.
Kahinumdoman nga ubay-ubay na ang naharang sa mga checkpoints sa syudad nga adunay dalang kontrabando hinungdan nga mibahad ang mga otoridad nga dili na lamang sulayan ang pagdala og druga sanglit hugtanon ang ilang pagpatuman sa seguridad ilabi na nga mas gipakusgan pa nila ang Culture of Security ug anti-illegal drug campaign sa dakbayan sa Davao. BNFM-DAVAO
