Nakikipag-ugnayan na si Senator Raffy Tulfo sa Malacañang at sa National Electrification Administration (NEA) sa layuning maresolba ang energy crisis sa Occidental Mindoro.
Ayon kay Tulfo, na chairman ng Senate Energy Committee, na tumawag na siya sa Malacañang para humingi ng appointment para personal na makausap si Pangulong Ferdinand ‘’Bongbong’’ Marcos Jr., upang talakayin kung papaanu makakatulong ang Senado sa naturang isyu.
Ibinahagi rin nito na nakausap na niya si NEA Administrator Antonio Almeda para talakayin ang kasalukuyang energy crisis sa Occidental Mindoro, na isinailalim sa state of calamity dahil sa 20-hour daily power outages doon.
Nabatid na noong April 5, nagsagawa ang komite ni Tulfo ng emergency consultative meeting na kinabibilangan ng iba’t-ibang ahensya ng gobyerno kung saan tinalakay ang malawakang blackout sa Occidental Mindoro.
Sa naturang pulong, nabanggit na gagawa ang Occidental Mindoro Electric Cooperative, Inc (OMECO) ng board resolution upang makautang umano ang NEA ng P50 million para makabili ng bunker fuel bilang pansamantalang agarang solusyon sa power outage. //MHEL PACIA-TRINIDAD
