Patay ang magtiayon human lakip nga nabanggaan ang ilang sakyanan sa nawad-an og prino nga ten wheele truck nga puno og tubo diha Sayre Highway, nga sakop sa P-4, Barangay Sinangguyan, Don Carlos, Bukidnon.
Giila ang mga biktima nga si Wenefredo Agustin, 50-anyos, kinsa driver sa Ford Ranger nga nagdala sa plakang KCT-337 ug asawa niini nga si Wendelin Agustin, 50-anyos, pulos residente sa P-2 Poblacion, Kadingilan, Bukidnon.
Base sa inisyal nga imbistigasyon sa kapolisan sa Don Carlos Bukidnon, gikabutyag nawad-an matud pa og brake ang ten wheeler truck nga puno og tubo ug mibangga sa lain nga mga sakyanan.
Tungod niini, nagkarambola ang lima ka sakyanan apan na-grabihan ang gisakyan sa mga biktima human daruha sa maong truck ug naipit kini ilalom sa ilang sakyanan.
Gidala pa sa Simbulan Hospital sa pamasin nga mabuhi pa ang magtiayon apan gideklara sa attending Physician nga si Dr. Reva Absuelo, nga dead on arrival.
Mag-atubang karun sa patong-patong nga kaso ang driver nga si Florentino Enad, 55-anyos, minyo, residente sa P-7 Brgy. Minsilagan, Don Carlos, Bukidnon kinsa gamaniho sa Nissan Truck nagdala sa plakang MVD-618, nga kasamtang gidetenar sa Don Carlos Municipal Police Station.
