NAGAPANLINGO ang pipila ka tricycle drivers sa kasamtangan nga presyo sa gasolina nga nakaabot na sa P80 pesos sugod March 15, 2022.
Na-agihan sa Brigada ang mga tricycle drivers nga nagatorno sa gawas sa Phase A, Public Market una si Jessie Tare, naga-sideline lang sa pamasada og tricycle aron dili daw motaas ang iyang blood pressure, aduna daw silay tindahan sa Calumpang.
Sumala niini nga P30 pesos hangtud P40 pesos ang ilang singil sa mga pasahero padulong sa Calumpang dependi sa kalay-on aron nga mabalansi usab ang kamahal sa gasolina.
Sumala usab kay Naim Abdul nga adunay lima ka anak, duha ang naga- eskwela bahala na daw mahal ang gasolina basta may kitaon lang matag adlaw aron nga makapalit og bugas ug sud-an.
Sumala usab kay Jerry Palo, nga kon isa lang ka pasahero ang sakay padulong sa Calumpang unya mobayad og P40 pesos, unya usa pod ka pasahero pabalik sa susamang plitihan, paigo lang kini sa usa ka litro nga gasoline ug walay ginansya mao nga nagahangyo sila sa pasahero nga mohulat gamay nga oras aron makaduha hangtud tulo ka pasahero bag-o molarga.
Kon makita daw niya nga wala na siyay ginansya sa kasamtangan nga sitwasyon sa pamasada mangita nalang kini og laing panginabuhian kay anaa sa P150 pesos ang iyang boundary matag aldaw. I Ver Diazon
