Patay ang trabahante sang isa ka bulangan sa nagluntad nga pagpangbuno sa Relocation Site, Barangay 9, syudad sang Kabankalan, pasado alas 4 sang kaagahon, Mayo 26, 2024.
Ginkilala ang biktima nga amo si Gerald Billeran, 40 anyos, lalaki, residente sang Sitio Lupni, Brgy. Hilamonan, samtang ang suspetsado ang ginkilala naman sa kay Ronel Tadiaque, 42 anyos, lalaki, tag-iya sang, mini carnival (peryahan), residente sang Sitio May-ang, Brgy. Tagukon, syudad sang Kabankalan.
Nagaguwa sa inisyal nga imbistigasyon sang kapulisan nga samtang nagalingaw-lingaw sa peryahan si Billeran wala sang kung ano man ginbuno ini ni Tadiaque sa likod kag gilayun nagpalagyo pagkatapos sang insidente.
Gindala sa Lorenzo D. Zayco District Hospital ang biktima para sa nagakaigo nga pagbulong apang gindeklarar ini nga Dead on Arrival sang Attending Physician.
Daan naman nga higut-anon kag indi pag-intyendihanay ang ginalantaw motibo sa nagluntad nga pagpangbuno samtang padayun naman ang hot pursuit operation sang kapulisan sa posible pagkadakop sang suspetsado. | Andy Tabugo Galve