HANGTOD karon nagapaabot pa ang mga hotel sa bayad gikan sa LGU Gensan sa ilang serbisyo alang sa nakwarantina sa ilang mga hotel atol sa pandemya.
Sa kumpermasyon ni Joy, usa ka receptionist sa hotel sa City Heights wala pa sila nabayran, ang impormasyon nga nakaabot kanila pinaagi sa ilang manager nga ginaproseso na ang bayad mao nga hangtud karon nagahulat lang sila nga mahatag na ang bayad.
Samtang sa kumpermasyon ni Allan, usa ka marketing officer sa hotel sa downtown area sumala niini nga ang ulahing katikaran nga iyang nadungog sa finance office kung asa kini nagapasa sa mga dokumento sama sa statement of accounts nga sa Desyembre 15 o bag-o sa mao nga petsa mahatag na ang bayad sa LGU Gensan.
Tungod niini malaumon sila nga mahatag na tinuod ang bayad kay taga gobyerno ang ilang transaksyon, kasaligan ug dili taga gawas.
Ang hangyo ni Allan nga ma-release gayod sa Desyembre 15 gumikan siya ug ang 15 niini ka kaubanan posibling dili makadawat og 13th month pay kon dili nila masingil ang LGU kay wala silay laing daku nga kita niining panahona.
Managsama usab nga gikumperma ni Joy ug Allan nga hinay hinay na nga nibalik ang pagdawat nila og walkin nga mga kliyente ug padayon ang ilang trabaho samtang wala nay nadugang nga gikwarantina sa ilang mga hotel. Kahibaluan nga gipatawag sa Mayor ang taga hotel, gi-atubang ug gisaaran nga bayaran ang ilang serbisyo ug duha hangtud tulo ka semana ang saad nga sila mabayaran. ( Ver Diazon)
