Nangayo ug pasaylo ang tag iya sa Supladoz Bar and Restaurant atol sa meeting nga gipahigayon niadtong milabayng adlaw kauban ang Davao City covid 19 Task Force kalabot sa pagdasok sa mga partygoers sa bar nga wala nituman sa health protocols.
Sumala ni Covid 19 Task Force Spokesperson Dr. Michelle Schlosser, bisag nangayo kinig pasaylo, padayonon gihapon sa city government ang paggukod sa nahimo niining kalapasan.
Gumikan nag operate kining walay business permit, imbistigahan una sa Business Bureau ang establisimento ayha pasakaan ug kaso apan gisaaran nga hatagan kini ug due process.
Kahinumduman nakadawat ang tag iya sa bar ug cease and desist order niadtong Domingo , Feb 20, usa ka adlaw human ang insidente.
Gisusi usab sa business bureau, Prevention and enforcement Team ug City Legal office ang mga bayolasyon nga nahimo sa bar sama sa implimentasyon sa Minimum Public health Standards ug mandatory DQR Scanning aron magamit sa pagpasaka ug kaso.
Kahinumduman Feb 19 sa dihang nagkaguliyang ang mga partygoers sa maong bar atol sa unang adlaw sa pag abre sa mga bar kungdiin masaksihan sa video nga wala nagsul ob ug facemask ang mga customers ug walay social distancing.
Human sa maong insidente, magpatuman na ug no vaccine no entry policy ang mga bar owners sa Davao.
