BICOL—Bako harayo na mangyari man sa syudad nin Legazpi an stwasyon ngunyan sa syudad nin Naga kun padagos na malangkaw an kaso kan COVID-19.
Sigun kaya ki alkalde Noel Rosal, siring kan syudad nin Naga, posibleng maisairarom man sa Modified Enhanced Community Quarantine (MECQ) an syudad hali sa presenteng General Community Quarantine (GCQ) kun dae mapupugulan an pagdugang kan kaso kan helang.
Sa ibong kaini, sinabi kan alkalde na wara man dapat ikahandal huli ta padagos pa man an mga negosyo sa lindong kan MECQ alagad igwa sana nin mga limitasyon na ipapautob.
Kabali sa mga ini an pagbabawal sa mga irinuman urog na sa mga pampublikong lugar, pagsarado sa mga resorts asin mga themed park asin recreation areas asin pagbabawal sa mass gathering.
Ibabawal man an pagparaluwas nin harong kun bako man importante an lakaw o bako man trabaho an dudumanan mantang 30% n asana kan kapasidad kan simbahan an aakoon sa mga misa.
Katakod kaini, tinawan doon kan alkalde an importansya kan pagsunod sa minimum health protocols ngani na dawa papano makontrol an padagos na paglakop kan COVID-19.
Apwera kaini, pig-iinguha man suboot kan syudad na makabakal nin dugang na bakuna ngani makua kan syudad an herd immunity asin mabawasan na an transmission kan helang.###
