Patay ang usa ka 33 anyos nga lalaki human gipusil sa wala mailhing suspek sa Prk. Maligaya B, Sitio Lawis, Brgy. Bato, Sta. Cruz, Davao del Sur, kagahapon sa hapon, Mayo 28,2024.
Sa inisyal nga imbestigasyon sa Sta. Cruz Police Station, nangape alas-4:30 sa hapon sa maong adlaw ang biktima nga nailang si Eduardo Quezon Nebres Jr. kauban ang iyang kaipon nga si Linie Salting Campaner, 33 anyos nga nanimuyo sa nasangpit nga lugar sa ilang panimalay.
Sa dihang miduol ang wala mailhing suspek ug mihanyag sa iyang gibaligya nga solar light.
Apan gibalibaran sa biktima ang suspek, namugos ang maong suspek ug misulod sa panimalay sa mga biktima. Kalit na lamang kini namusil tumong sa biktima pila ka higayon nga maoy hinungdan sa hinanaling kamatayon niini.
Nakuha sa crime scene ang upat ka basiyo sa bala ug duha ka bala sa gituohang 45 caliber.
Ang patay’ng lawas sa biktima ang anaa sa Esperanza Funeral Parlor, Brgy. Zone 3, Sta. Cruz, Davao del Sur, samtang, naglusad og hot pursuit operation ang otoridad batok sa suspek.
