Pasakahan ug kaso sa lokal nga kagamhanan sa Davao ang tag-iya sa Supladoz Restobar sa Ilustre St., ning syudad, tungod sa kawad-on ug business permit.
Gawas pa niini, nakasupak usab sa COVID-19 protocols, sama sa pagpatuman sa minimum public health standards (MPHS) ug Safe DQR scanning sa mga kliyente sulod sa establisyemento.
Gikanayon ni Davao COVID-19 Task Force Spokesperson Dr. Michelle Schlosser, nga na-isyuhan na sab ug citation tickets ang mga nakasupak sa health protocols niadtong Sabado, February 19, 2022.
Gitataw pa ni Dr. Schlosser nga walay record sila nga nakita sa DQR nga dunay misulod o gawas sa maong gambalay.
Gitataw pa sa city health official nga gitun-an na karon nga ibutang sa alert level 2 status o ngadto pa sa alert level 1 ang syudad, apan kung padayon nga magpabagdlong ang mga Dabawenyos mabalik ra kini sa Alert level 3.
Nanghinaut na lamang si Schlosser nga mamahimo kining pahimangno sa uban nga padayon sa pagtuman sa MPHS tungod anaa pa gihapon ang presensiya sa COVID-19.
Tungod niini, nag deploy og dugang personahe ang DCPO sa nagkadaiyang bars sa syudad aron mamonitor ang mga establisyemento nga musupak sa maong mando ilabi na karon nga mas gipaluagan pa ang restriksyon partikular na ang pagbakwi sa modified liquor ban.
Kahinumdoman nga una ng nag viral ang maong restobar tungod sa kata-as sa pila sa mga customer nga buot maglulinghayaw human sa pagtugot sa Lokal nga Panggamhanan sa dakbayan sa Davao sa subling pag operate sa mga bars. BNFM-Davao
