GIPANGHIMAKAK ni Noel Nacion, tigpamaba sa SSS-GenSan ang gikaingon nga kutob na lang sa 2030 ang pondo sa maong ahensya.
Gitino niini nga niadtong 2020 medyo may pagkunhod sa kontribusyon tungod sa pandemya ug ning tuiga, mi-arang arang na ang koleksyon.
Kung muundang matud pa sa pagbayad ang mga miyembro sa ilang kontribusyon ug employers sa ilang counterpart posibleng mahitabo nga mawad-an og pondo.
Apan hangtud magpadayun ang paghatag sa ilang contributions ang mga miyembro, walay angayang kabalak-an ang katawhan.
Dugang pa ni Nacion, bisan sa pandemya, gapagawas gihapon og minilyon ka pesos nga mga benepisyo ang SSS sa ilang mga miyembro.
Una nang giangkon niini nga apektado usab ang pagbayad sa mga miyembro kung istrikto ang quarantine classifications tungod dili makagawas ang mga tawo ug may pipila ka kompanya ang nanirado.
Samtang dili usab daw mabangkarote ang SSS hangtud nga gapadayun ang pagbayad sa mga miyembro sa ilang kontribusyon.
