Patay ang duha ka mga drug suspect sa gihimong buy bust operasyon sa Barangay Mambaling, Dakbayan sa Sugbo.
Giila ang mga napatay nga si alyas Ryan ug John Kerlou Pojas, 22 anyos residente sa Barangay Pusok, Lapu-Lapu City.
Gibutyag ni Police Colonel Regino Maramag, hepe sa Police Drug Enforcement Unit (PDEG) 7 nga usa ka buwan nilang gipa-ubos sa surveillance ang mga suspek diin nakig-transak dayon sila ni Ryan ug usa ka kilo nga shabu.
Giingong nakabantay ang mga suspek nga mga pulis ang ilang gika transact, hinungdan nga una kining namusil, apan nakabawos ang kapulisan hinungdan nga naigo ang duha sa nagkadaiyang bahin sa lawas nga miresulta sa ilang kamatayon.
Nasayran nga gawas sa usa ka kilong shabu nga nasakmit dihang nakig-transak ang kapulisan, nakuhaan pa usab ug kapin sa tulo ka kilo ang gisakyan sa duha.
Giingong anaa sa kapin P30 million ang balor sa nasakmit nga suspected shabu base na usab sa Dangerous Drugs Board (DDB) value.
Gawas sa shabu, nakuha usab gikan sa duha ang KG9 submachine pistol ug usa ka kalibre .45 nga pistola.
Sa pakighinabi sa mga tigbalita ni Police Brigadier General Ronnie Montejo, ang direktor sa Police Regional Office 7, mitug-an kini nga gikan sa Manila ang maong suplay sa illegal drugs.
Giingong ang source niini, sakop sa grupong Bilibid 19 ug basi sa ilang surveillance, ipa-agi nila kini sa cargo vessel. Gawas sa pagkalambigit sa illegal drugs, nasayran usab sa kapulisan nga mga hitman ang duha ka napatay.
