Ni request ang Cebu Citizens-Press Council (CCPC) ngadto sa kapolisan nga mopahigayon og lawom nga imbestigasyon alang sa dali nga pagkasulbad sa kaso nga pagpusil patay sa dyRB broadcaster nga si Reynante “Rey” Cortes kinsa naghupot usab og commentary program sa usa ka AM radio station.
Si Cortes gipusil patay sa wala pa mailhing mamumuno kagahapon Hulyo 22,2021 sa gawas nga bahin sa estasyonan sa Brgy. Mambaling dakbayan sa Sugbo diin siya nagbroadcast.
Base sa giluwatan nga pamahayag ni Atty. Pachico A. Seares Executive director Cebu Citizens-Press Council, nga bisan pa kun ma regular staff member man siya o ma block-timer dili kini makausab sa kamatuoran nga siya usa ka media practitioner ug kinahanglan masikop ang mipatay niini.
Gitin-aw ni Seares nga si Cortes gipatay, ubos sa Standard Operating Procedure 2012-006 nga penetsahan Nobyembre 12, 2012 o “heinous and sensational crime.”
Kinahanglan nga ang maong kaso ma-imbestigahan sa Special Investigation Task Group (SITG).
Ang mga media practitioners lakip sa susamang categoriya sa vice governors, PB members, mayors, vice mayors, councilors, barangay kapitan ug konsehales, judges, prosecutors ug lawyers, ingun man militants.
Giklaro usab ni Seares nga ang mga media workers dili mga espesyal nga tawo og dili magdahum og special treatment.
Sanglit adunay 223 ka kaso sa pagpangataki ug mga pagpanghulga sa nga sakop sa media sukad niadtong 2016 (as of May 1, 2021), nabalaka ang CCPC nga aduna na sab laing kaso sa pagpatay sa mga sakop sa media nga dili masulbad dili lamang sa media kun dili lakip na sakop sa ubang sektor.
Posible matud pa nga ang pagpatay kang Cortes adunay kalambigitan sa trabaho niini apan bisan kun walay labot ang iyang pagkasakop sa media, hulga gihapon kini sa kahapsay ug kalinaw sa Sugbo.
Samtang, gipasalig ni Police Lieutenant Colonel Wilbert Parilla, deputy director for operations sa CCPO nga momugna sila og SITG ang kapolisan sa dakbayan aron daling masulbad ang kaso sa pagpatay ni Cortes.
Sa samang bahin, giangkon ni Police Major Juanito Dindo Alaras hepe sa Mambaling Police station nga blangko pa sila kung kinsa ang nagpatay sa komentarista.
Wala sab gibalewala ni Alaras ang posibildad nga usa ka sniper ang mihimo sa kremin.///
