Misulod sa pagpamaligya og illegal nga drugas ang 33-anyos nga single mom apan nasikop kini atol sa gipahigayon nga buy-bust operation sa kapulisan sa Parian Police Station pasado alas 9 sa kagabhion didto sa Lower Lumar Brgy. T-Padilla Dakbayan sa Sugbo.
Ang single mom nga dinakpan giila nga si Alyas Princess, 33-anyos, walay trabaho ug residente sa Spolarium St. Brgy Duljo Fatima Dakbayan sa Sugbo.
Nakuha gikan sa dinakpan ang 5 ka gramos sa gituohang shabu.
Depensa ni Alyas Princess, tungod kay wala siyay bana ug aduna pa siyay gagmayng mga anak, naka-desisyon siya sa pagsulod sa pagpamaligya og illegal nga drugas aron adunay ikabuhi sa iyang mga anak.
Dugang pa, maglisud pud kini siya pagpangita og trabaho sanglit high school ra siya kutob sa pagtungha.
Bisan paman sa pagkasikop ni Alyas Princess, nibutyag kini sa iyang pagmahay kung nganung nisulod siya sa pagpamaligya sa illegal nga drugas.
Gikustodiya na sa custodial facility sa Parian Police Station ang dinakpan samtang gihikay na ang kasong kalapasan sa Sec. 5 ug Sec. 11 sa Article II sa RA 9165.
