KUMPERMADO nga adunay sinakung bugas nga nabulok sa Lagao gymnasium nga lakip sa P400 million pesos nga pondo alang sa ayuda sa katawhan sa Gensan nga naigo sa pandemya.
Sumala kay Assistant City Administrator Voltaire Tiu nga P400 million ang gigahin nga pondo sa syudad sa miaging tuig alang sa bugas samtang P20 million pesos ang ilang gipadugang sa supplemental budget kay hapit na mahurot ang pondo sa Lagao gymnasium ug ang incharge sa imbentaryo mao si Executive Assistant III Jose Kevin Sienes.
Sa bahin ni Sienes gikumperma niini nga kulang na usa ka libo ka saku ang nabilin nga pondo sa bugas, ug kumpermado usab ang impormasyon nga adunay nadaut o nabulok nga bugas.
Sa bana-bana ni Sienes anaa sa usa ka gatus ka saku ang may nadaut ug sa tingob anaa kini sa 20 hangtud 30 ka saku sa bugas ang nadaut.
Ang ginalantaw daw nila nga mga rason mao ang handling ug environmental gumikan dili andam ang syudad sa pag-stock og susama ka daghan nga bugas.
Gidugang ni Sienes nga sauna sa bodega sa NFA gibutang ang mga bugas apan sa pag-expire sa nalagdaan nga Memorandum of Agreement kon MOA tali sa LGU ug NFA gibalhin sa Lagao gymnasium ang mga bugas.
Ang nahitabo wala silay kahanas sa bodega mao nga nabuot ang anaa sa ilawom unya ilahang gibalhin ang uban sa gawas sa gym unya gibutangan og trapal apan tungod sa kusog nga ulan na-ambihan mao nga aduna na usab nadaut.
Ang ilang gihimo gi-repack nalang aron nga mapuslan pa ang nabilin sa saku nga wala nadaut.
Gidugang ni Sienes nga nagahatag sila og bugas paagi sa mga barangay ug sa naga-abot nga mga request ngadto sa Mayor’s Office. ( Ever Diazon)
Photo File: LGU Gensan
