NAGDASUK ang mga katawhan nga gustong magparehistro sa Comelec Gensan atol sa sattelite registration nga gihimo sa Barangay Lagao, Agusto 19 adlaw nga Huwebis.
Naaktuhan sa Brigada News FM GenSan ang daghang katawhan nga may dalang rekositos sa pagparehistro gawas sa barangay gymnasium, ang uban nakasulod na samtang taas ang pila abot sa opisina sa Girlscout bisan sa kainit sa panahon.
Dali usab nga nirespondi ang clearing team sa barangay nga maoy gitahasan nga magpadistansya sa matag usa nga anaa sa pila gamit ang megaphone ug batota.
Sumala kay Romnick Aques, usa ka team leader sa clearing team sa Barangay Lagao nga sila ang bahala sa pila, mao nga iyang gina-anunsyo ang patakaran sa social distancing.
Apan bisan sa iyang pagsinggit gamit ang megaphone aduna gihapon nga gahi og ulo nga dili magdistansya sa kadaghan sa tawo.
Sa bahin sa Comelec, sumala ni Election Officer 4 Anwar Paidumama ang Barangay ang naga-request sa sattelite registration ug sila usab ang bahala sa seguridad ug sa pagpatuman sa health protocol, nigawas daw ang Comelec sa ilang opisina gumikan usab sa kagamay ang espasyo ug limitado lang sa 50 ang madawat nga aplikasyon matag adlaw samtang sa sattelite registration maka-atiman sila og registrants hangtud usa ka libo gikan alas otso sa buntag hangtud alas singko sa hapon.
Gidugang ni Paidumama nga mas nindot gihapon sa mall kay dili init lapad ug may mga gwardiya nga nagatabang sa pagpatuman sa health protocol.
Sa ulahing mall registration niabot sa 345 ang nadawat nga aplikasyon sa Comelec Gensan. ( Ever Diazon)
