BNFM BICOL—Inihayag ni Legazpi City Mayor Noel Rosal na tiwala umano siyang muling babalik ang sigla ng ekonomiya sa lungsod ng Legazpi makaraang maabot nito ang ‘herd immunity’ kontra COVID-19.
Ayon sa alkalde unti-unti nang maibabalik sa normal ang operasyon ng mga business establishment sa lugar na makakatulong upang muling mapataas ang employment rate sa lungsod partikular sa mga residenteng nawalan ng hanapbuhay sa kasagsagan ng pandemya.
Batay sa pinakahuling tala, umabot na sa kabuuang 160,050 mga indibidwal sa Legazpi City ang nabigyan na ng first dose ng bakuna habang nasa 128,212 naman ang fully vaccinated na kontra sa nakamamatay na virus.
Sakabila ng magandang vaccination roll out ng lungsod, patuloy pa rin ang panawagan ng alkalde sa mga Legazpeño na matamang sundin ang mga umiiral na minimum public health standards at huwag nang magdalawang isip na magpa bakuna dahil ito ang unang depensa ng katawan upang hindi mahawa ng nakamamatay na sakit.###
