Padayon pang gisuta unsay motibo sa usa ka sekyu nganong iyang gi-unay sa pagpusil-patay ang iyang kaubang sekyu atol sa bisperas sa pasko, Disyembre 24 sa buntag, sulod mismo sa Citi Hardware, Balusong Branch, Diversion road, Brgy Matina Crossing, ning syudad sa Davao.
Ang biktima nailang si Joseph Pastera Caytor, 28, lumad nga taga- Tagbena Surigao, ug nanimuyo sa Tahimik Avenue Davao City.
Samtang ang suspek nailang si Diobito Pontero Narisma, 33, minyo ug residente sa Jasper St., Sto. Niño, Matina, ning syudad.
Sa inisyal nga imbestigasyon sa mga personahe sa Talomo Police Station, gisaysay sa nakasaksi nga si Kimby Drilon Gucila, 28, nga taga- Pulang Lupa, likod sa Grand Regal, Lanang, nga samtang nagsulat siya sa logbook sa may baggage counter area nakadungog siya og buto sa armas.
Sa iyang pagsusi mao ang iyang nakita ang suspek nga gipusil ang biktima tumong sa ulo niini nga maoy hinungdan sa iyang hinanaling kamatayon.
Daling gidakop sa kaubanang security guard nga si Arbi Garcia Betita ang suspek human sa nahitabo.
Narekober sa crime scene ang usa ka unit sa 9mm RIA firearm, tulo ka buhing bala ug duha ka basiyo sa.9mm nga karon anaa na gikustodiya sa Regional Forensic Unit XI.
Tanggong na sa Talomo Police Station ang suspek samtang gihikay na ang mga dokumento alang sa pagpasaka sa og kaso.
