Mokabat na sa 299 ka residente gikan sa siyam ka sitio sa Barangay Santiago sa Caraga Davao Oriental ang nakasinati og diarrhea.
Gikabalak-an karon ni Dr. Chris Anthony Limen, Caraga municipal health officer nga madugangan pa ang ihap sa mga biktima sanglit ang ubang pamilya nga dunay myembrong nakasinati na sa sintomas niini ang wala nagpahibalo.
Gibirepika usab sa buhatan ang gikatahong usa ka residente na ang namatay tungod sa dehydration samtang pipila sa mga pasyente nga gidala sa Caraga Health Center ang anaa na sa stable nga kahimtang.
Gipahimangnuan usab sa opisyal ang mga residente sa lugar nga likayan una ang pag-inom og tubig gikan sa ilang gripo human usab gikumpirma sa Davao Oriental provincial health office kagahapon nga kontaminado sa cholera bacteria ang tinubdan sa ilang tubig nga maoy hinungdan sa kalibanga.
Una nang nagbahad ang sanitary office sa maong probinsya labot sa kontaminado nga water system sa lugar ug girekomenda ang pag-rehabilitate nunot sa natala nga unang kaso sa cholera sa miaging tuig.
Duna nay P20M nga pondo ang gitagana sa provincial government sa Davao Oriental alang sa rehabilitasyon sa water source apan hangtud karong panahona wala pay aktwal nga pagtrabaho sa proyekto.
Sa pagkakaron, plano sa local health office sa Caraga nga i-convert ang existing COVID-19 quarantine facility arn maakomodar ang mga pasyenteng nakasinati og diarrhea samtang ang Provincial Health Office naglusad na og assessment aron ma-contain ang sitwasyon sa Barangay Santiago.BNFM-DAVAO
