LEGAZPI CITY – Pigprepararan na kan Department of Education (DepEd) Legazpi an sarong semanang Brigada Eskwela na may temang “Bayanihan para sa matatag na Paaralan” kun sain iyo ini an preparasyon sa pagbabalik eskwela sa maabot na Hulyo 29 2024.
Segun kay Senior Education Program Specialist asin Division Focal Person kan Brigada Eskwela Hillmer Ballesteros, sarong semana subuot ang Brigada eskwela na gigibohon kan mga estudyante, magurang, asin stakeholders nganing maglinig an mga gamit sa laog nin eskwelahan.
Aminado si Ballesteros na hababa man sana an pondo na pigtatao sa laog nin sarong taon sa kada eskwelahan. Sinabi pa niya na an pondo pigbabase sa numero kan mga enrolled na learners sa sarong eskwelahan o iyo an pig-aapod na Maintenance and Other Operating Expenses (MOOE).
Segun pa sa opisyal, nagkakaigwa muna subuot nin assessment sa kada eskwelahan nganing hilingon asin aramon kun siisay o arin an ipaprayoridad na mapokusan na gagastosan na eskwelahan.
