Mabahoe ro pasaeamat sa Brigada News FM Kalibo ni Mr. Eric Labajo, sambilog sa 16 nga workers nga gin-abandona it andang contractor iya sa Brgy. Ugsod, Banga, Aklan.
Raya hay bangud nag abot eon si Regional Director Ma. Evelyn B. Macapobre it Department of Social Welfare and Development (DSWD) Field Office VI para buligan sanda nga makauli sa andang lugar.
Insigida nga nakaabot ro taga DSWD-6 sa Aklan matapos ipaabot it Brigada News FM Kalibo kay DSWD Secretary Erwin Tulfo ro problema it mga workers.
Sa interview it Brigada News FM Kalibo kay Mr. Labajo, naka eumpat ro iba nana nga kaibahan sa kalipay kat nasayran nga nag abot eon ro taga DSWD-6 bangud sayud nanda nga mabuligan eon sanda.
Matandaan nga nag abot sanday Labajo ag ro anang mga kaibahan sa Aklan ku Hunyo 23 para magtrabaho sa ARRL Cable Installation Services, pero gin-abandona sanda it andang contractor halin sa GEDN OSP Designs and Services.
Naging emosyunal man si Mr. Labajo sa pagpasaeamat kara sa mga Aklanon nga padayun nga nagatao it bulig kanda matapos mabatian sa Brigada News FM Kalibo ro andang sitwasyun nga matapos sanda nga pabay-an it andang contractor hay saging eon lang ro andang ginakaun agud mapawi ro andang nabatyagan nga gutom. / ANN DESLENE SALAZAR
