-Reymund Titong
KABANKALAN CITY, Negros Occidental — Kun balikan ta ang gin-agyan ni engineer Ray Bustamante antis ini siya nangin general manager (GM) sang Negros Occidental Electric Cooperative (NOCECO), nangin ordinaryo danay ini siya nga empleyado sang kooperatiba sang masubra 20-anyos.
Pahayag ni Engineer Ray Bustamante, nag gikan sa mga normal nga buluhaton, nangin department manager siya sang NOCECO, kag nakahatag sang dako nga kontribusyon sa pagpahapos sang pagpamalakad sa teknikal nga aspito sang kooperatiba.
Bangud sang iya nga kridibilidad kag kapabilidad sa pagsulbar sang mga dalagko nga problema teknikal sa kooperatiba, nakita sang mga board of directors (BOD) sang NOCECO ang iya kapasidad, kag gin-appoint bilang general manager sang mga BOD sang Enero 1, 2022, sa tion nga naga problema ang kooperatiba sa milyones nga kapyerdihan bangud sang paglaslas ni Bagyong Odette sang Disyembre 2021.
Sa tion sa pagpungko ni Bustamante, suno naman sa pahayag ni Irene Viason, anay ethics committee member sang NOCECO, madasig nga napangitaan solusyon ni Bustamante ang naga-luya nga kooperatiba kag amat-amat nga nabawi ang kapyerdihan. Dugang pa ni Viason nga na-aprobahan man sang mga member-consumer-owners (MCOs) sang 2022 ang pag-appoint kay Bustamante bilang bag-o nga GM, nga nag tal-os Kay engineer Jonas Discaya.
Matapos ang pila ka tuig nga pag guyod sa NOCECO gikan sa pil-as sang kapyerdihan, sang Oktubre 26, 2023, mismo si National Electrification Administration (NEA) administrator Antonio Mariano Almeda, ang nagpadulong sa opisina sang NOCECO sa Kabankalan, kaupod si Negros Occidental Vice Governor Jeffrey Ferrer agud e-suspend si Bustamante kag ang mga BOD sa ila pwesto, sa alegasyon nga dapat mag-agi anay ang tanan nga appointments sa NEA antis magpungko, base sa memorandum circular 2017-035 sang ahensya.
Apang, matapos ang anum tanan ka bulan nga suspensyon, natigayon nga ginkakas si Bustamante kag ang mga BODs sa ila pwesto nga wala bisan piso nga makuha. Gin-kwestyon naman ini sang legal council ni Bustamante nga si Atty. Rey Gorgonio, nga ang NEA, wala sang kinamatarong nga diktahan ang mga BOD nahanungod sa mga appointments samtang ang kooperatiba wala naga problema sa pinansyal nga aspeto.*
