-Daina Gerona
KABANKALAN CITY, Negros Occidental — Ginakalipay sang Tapi-anon kag mga opisyales sang Barangay Tapi ang bunga sang kadalag-an sang Charter kag Sinulog 2023 Dancers sa isa ka Multi-purpose Vehicle.
Ini ang ginpaga-blessingan tinalikdan nga adlaw, agud nga magamit na sa gilayon sang tanan nga mga residente sang Barangay sa ti-on sang emerhensya kag kalamidad.
Base sa palayag ni Kapitan Giovanni Ibañez, sa interbyu sang Brigada News Team, nga ang amo nga salakyan ang bukas para sa tanan nga nagakinahanglan apang pagklaro Niya, nga kinahanglan sang residente nga mag-usar sang salakyan amo ang pag-aman para sa krudo sang Multi-purpose vehicle agud nga indi matam-an ang barangay.
Suno pa kay Ibañez, nga kinahanglan tipigan ini sang sin-o man nga maggamit agud nga mas madamo man ang maka-benepisyo sini.
Angot sini, nangin mapinasalanaton naman ang pila ka mga Tapi-anon indi lamang sa salakyan kundi sa talento man sang mga pamatan-on sa Barangay nga nagadala sang kadungganan sa amo nga lugar.
Madumduman nga sang tinalikdan nga tuig 2023, nakuha sang Tapi National High School ang 1st Runner -Up sa Charter Day Celebration, dance competition, kag subong man 1st Runner -Up ang Tribu Gurang sa Sinulog Festival Dance Competition kag ginpuli ang cash price nga sa karon nangin isa ka Multi-purpose Vehicle.*
