RESPETOHON sa kapulisan ang tawhanong katungod ug sundon ang balaud sa pagpadayon sa ‘war on drugs’ sa Soccsksargen region.
Kini ang gisiguro ni Brig. Gen. Alexander Tagum, regional director sa Police Regional Office (PRO) 12. Dungan sa pamahayag ni Benjamin “Benhur” Abalos Jr., nga ipadayon ang hugot nga kampanya batok iligal nga droga.
Matud ni Tagum, nakasiguro siya nga nasayod ang mga sakop sa balaud nga sundon sa kampanya hinungdan nga sila ang mosunod niini.
Sa rekord sa PRO-12, sulod sa unom ka tuig nga kampanya batok iligal nga droga, mokabat sa 10,376 lehitimong operasyon ang nalusad.
Asa naa sa 10,860 katao ang nasikop samtang mokabat sa 42,151 indibidwal ang misurender dungan sa Oplan Tokhang.
Kinatibuk-ang, 31,745 surrenderers ang mipailawom ug nakakumpleto sa Recovery Wellness Program (RWP) sa kapulisan.
Samtang, 946 barangays sa rehiyon ang naa sa drug-free status ug upat ka barangay ang unaffected base sa oversight.
Kahibaloan nga nahimong kontrobersyal ang giyera kontra iligal nga droga tungod sa gikaengong pobre ang nahimong biktima niini.
Sa GenSan, pipila ka pamilya sa napatay sa operasyon ang mireklamo tungod sa pagkamatay sa ilang kabanay sa kamot sa kapulisan.
Apan gihingusgan sa mga pulis nga gisunod nila ang balaud sa operasyon apan misukol ang punting hinungdan nga namusilan. I Richel Gubalani
